طبخها نكبة ياأبويا

طبخها نكبه يا أبويا

يخش (باسم ) الثلاثيني بيتو متصربع بعد مارجع من سفره قصيره للاستجمام في وحده من الدول المشهوره بالمنتجعات الصحيه ، وكان راجع مبسوط مره ومظأطط ، طبعاً أصلاً مين محيكون مبسوط بعد السفر وتغيير الجو وكان باين على وجهو انو انبشم أكل ومتعه .

ساره / الحمد لله على سلامتك حبيبي ها بشر يارب تكون أنبسطت وفليتها في الدوله دي نسيت ايش اسمها مره صعب الشي يك

باسم / التشيك يا روحي كم مره أقلك ، يسلمك ربي ، طبعاً انبسطت أخر انبساط وفليت أمها ، يوه على أكلهم يجنن ، أخيرا ارتحت وعملت ريلاكس والله كنت مهلوك من العمل والكرف في الشركة ،خاصةً شغلي جنب المولدات حقت الطاقه خلت جسمي مكهرب وسعر راسي واقف 😂

ساره / ههههه باين عليك وجهك أتلفخ من الاكل شكلو أكلهم طعم متى تودينا نتمشى احنا كمان .

باسم / ياشيخه قولي ماشاء الله لاتحسديني ، بوديكم بس مو دي الدوله ماتنفعلكم تطفش هي حقت استجمام وعلاج وانا اعرفكم تحبو الملاهي والبرمان .

ساره / صح والله كلامك صادق اجل ودينا بلد فيها تماشي كده تجيب العافيه قول طيب (( الله يخليك ))😍

باسم / طيب ، حاضر ، أنتي أشري بس وانا شبيك لبيك باسم بين أديك كم ساره عندي حبيبت قلبي وعمري أنا .

ساره / الله يسعدك خلاص لا تكسفني ترى مره انكسف بسرعه والبزوره لا يسمعونا ، تبغا أجهزلك العشى حبيبي

باسم / ربي يخليك ليا ولا يحرمني منك ، انا دحين شبعان مره لو جعت بأديك خبر لا تشيلي هم ابدا ابدا من دا الموضوع ماحب اتعبك الا فين الاولاد مالهم حس ولا استقبلوني ؟ ولا وزعتيهم 😎

ساره 🫣/ لا ماوزعتهم نامو مساكين استنوك ونعسو ونامو .

باسم / اجل خلاص بكره أخرجكم امشيكم وبعدها نمر على بيت ابويا اسلم عليه مره وحشني

ساره / تمام مره فكره حلوه 👌وبالمره أنا أطبخلكم العشى في بيت عمي مو كل مره تتقل عليه يجيب أكل جاهز ، مصاريف زايده وخلاص طيب اتفقنا ؟ ترى اوعدك دي المره يظبط الاكل 🤝

باسم بحلطمه 😒/ ياريت اتمنى ياشيخه .

تاني يوم خرج باسم مرتو واولادو ومشاهم وماخلى نفسهم في شي والا جابو وبعد ماخلصو مرو على السوبر ماركت وأخدو مقاضيهم وراحو على بيت عم عبد اللطيف الي فرح مره بجيتهم وكان معبيلهم المكسرات والحلويات وكان فرحان مره بيهم وطاير

عبد اللطيف / ها كيفك ياولدي وكيف دنيتك وأحوالك وسفرتك الكذبيه (( وينغزو في بطنو )) ها بشر أنبسطت 😜

باسم / ارخي صوتك يأبويا يرحم أمك مابغا ساره تنتبه لشي أروح في داهيه يكفي أنها اتعاملت مع سفرتي الفجأه دي ببرود غريب وماناكفتني 🤫

عبد اللطيف / ياواد لا تنفجع كده الاولاد في الحوش بيلعبو ومرتك غايصه في المطبخ بأياديها ورجولها مع الشغالات هيا أنطق أشوف كيف الحرمه الجديده ريحتك ولا لا واهم شي كيف طبيخها ؟؟🤤

باسم / وااااي يأبويا أيش أقلك واحكيلك بس اخ واخ ، عليها طبيخ وأكل يجنن ماتقدر توقف أكل وربي فكرني بأكل أمي الله يرحمها الي يخليك تاكل بدون ماتوقف لين تنبشم ، لسه فاكر أكلها لدحين .

عبد اللطيف / يالطيف ياولدي الله يستر عليك يامفجوع مين يقول واحد يتجوز على مرتو الي يحبها ويموت فيها عشان طبيخها مو طعم ! 😒

باسم / والله ياأبويا أنا كنت باتمرمط من أكل ساره مايتاكل بطال مره وانت دقت أكلها وانت تعرف الحله والنسب 😫

عبد اللطيف / اييبه فاكر ياولدي ومين مايفتكر افتكر أمك الله يرحمها ويشبش الطوبه الي تحت راسها تعبت معها وهي تعلمها ،ناحلتها وطلعتها من طورها وطلعتلها قرون 😡وكم مره بغيت تضربها لمن طفشت منها ، والله كانت تحزن عليك وتأكلك بالدس عشان ماتزعلها ، بس خلاص المكتوب باين من عنوانه شاطره في كل شي ماعدا الطبيخ ياكافي البلا 🥵

باسم / بلا في شكلها حلوه واكلها مجغ شفت قلتلك انا معذور كنت حأتجنن ولا والمصيبه تكابر ماتبغا اجيب اكل من بره ولا أوصي طبخ تقعد تتبكبك ماتبغا من هنا ولا من هنا جننتني خلاص والبزوره المشكله أتعودو على اكلها هنا المصيبه ماعد صارو يفرقو بين الاكل الطيب من الي مو طعم 🤓

عبد اللطيف / عارف ياولدي من صغرك وانت تحب الاكل وتحب تطفح ، مح احترامي الشديد لك ولكرشك 😂

باسم / ايوه عرف انا اصلا مشلوم خلاص ارتحت ياأبويا هيا دحين المصيبه هي بتطبخلنا بمقاضي كلفت الشي الفلاني وكلو حيرمي صدقه يعني بتكسب اجر الغلابا اكتر من مابتكسب فيا ، خليني اقوم انتشلي صامولي قبل ماتورط 🤫

عبد اللطيف / ياواد دقيقه هي عروستك الجديده ايش اسمها

باسم / ميمونه يأبويا (( حط أسمها في الذاكره المنسيه جوه العقل الباطني حقك طيب )) خلاص سكتم بكتم ، اوخلي الرمز بيننا ليمونه سوي زهايمر 😁

عبد اللطيف / قوم يازفت زهايمر في عينك مح أجيب سيرتها تاني هيا ارتاح وروح القطلك شي تطفحو قبل التسمم مايجي ، تعال هنا أخر سؤال هيا (( ليمونه )) تعرف ليش اتجوزتها ومتقبله عيشتكم الي زي الحراميا الي بيصرقو في النهار 🤨

باسم / ايوه طبعاً عارفه أني أخدتها عشان الطبيخ ومبسوطه ومتقبله ، يكفي أني أصغر منها وأحلى منها😎 بتطير بيا وما أتجوزتها الى وانا دايق طبيخها الي ياخد العقل .

عبد اللطيف / طيب الله يهني سعيد بسعيده ، طيب كيف تبرر خروجك وغيابك الي كل شويه لساره ماتخاف تنفضح ياواد 🤥

باسم / حأحاول قد ما أقدر المهم ساره ماتعرف والله ماطيق تنزل دمعه من عينها🥲 انت تعرف قد ايش اموت فيها واحبها واتمنالها الرضى ترضى هادي حبيبت قلبي الي كنت احلم بيها ومح انسى ابدا كيف كانت تحاول تتعلم تطبخ ، مح انسى كميه الكتب حقت الطبخ الي اشترتها بفلوسها ولا ماخلت حرمه ماطلبت منها تعلمها مافي فايده حتى ام عباس جارتنا ما رحمتها وفي الخير طردتها وسبتها 🤬وقالتلها انتي ماتنفعي عساكي بالحمبتري بلا في شكلك وهاديك ماتت من البكى 😰

عبد اللطيف / ياساتر استر ياربي لا تفضحنا بين خلقك ، المهم دحين انت لازم. تعدل بينهم وهم الاتنين أمانه في رقبتك والميلان والخبلان الي انت فيه مو طيب ياولدي لازم تشفلك حل وتمهدلها الموضوع قبل ماتوقع الفاس في الراس ترى حبل الكدب قصير🤥

باسم / طيب يا ابويا الله يسهل 🫡

بدأ باسم طبعاً تكتر سفرياتو و خروجو وكان يتحجج بميه حجه وميه عذر وساره ياغافل لك الله في ملكوت تاني مو منتبهه ابدا همها اولادها وشغلها وكيف تتعلم على الطبخ بس غلبانه أكلها برضو ماينطاق 😑 بس بعد فتره انتبهت لشي أنو باسم بدأ يتخن ويمتن وزاد وزنه وكانه حيتفزر ولاحظت كمان انو بدأ يشتري حوايج جديده وهي بدأت تتضايق وتلمحله 🙄 وهو ولا هنا ولا عليه منها والي كان يبغا يجننها انو مابياكل في البيت مره ولمن كانت تساله كان يجاوبها انو بياكل في العمل وبيجوع كتير فما بيقدر يصبر على الجوع بسبب المجهود العالي الي بيسويه فكانت تسكت وتراقب باستغراب 😮وبعدين هيه عجبها الوضع حبه حبه فكانو صار عندها حريه تخرج مع صاحباتها واهلها لمن يسافر وبطلت تناحل نفسها في الطبخ وكانت تمشي حالها هي واولادها بخفايف فكأنو صار أكلو بره جا على طبطابها واراحت من الهم 😮‍💨

وفي يوم كده في العصر استأذن بدري من شغله ونط بيته التاني عند ميمونه متحمس يشوف أيش طابختلو 🤤

باسم / كيف ست البنات ها بشري ايش طابختلنا اليوم ، والله اسكتي ياشيخه المنسف الي سويتي قبل امس قعد احلم بيه طول الليل وطعمه باقي في لساني لليوم تصدقي وتأمني بالله 😍

ميمونه / والنعم بالله ، ماشاء الله قد كده عجبك بسم الله عليك بالعافيه ترى داك كان ربع خروف واكلتو كلو وخفت عليك يجيك تلبك 😰

باسم / لا ياشيخه بسم الله عليا أكل نص خروف كمان ، انا مادري أمي الله يرحمها اتوحمت على ايش بس كانت تطبخ طبيخ الله اكبر كنا نرجع من المدرسه زي المجانين ناكل طبيخها ونضارب عليه 🤤🤤🤤

ميمونه / الله يرحمها ويغفرلها اكيد بدام بتقول كده معناتو كانت طباخه شاطره ونفسها حلو

باسم / ايوه صحً كلامك بس انتي حكايه تانيه والله طبيخك ما يتكرر مادقت زيووو ابدا ، الا بالمناسبه ايش مسويتلنا اليوم بشري ، خلاص انا رياقيني سالت والجوع دبحني ، ايشبك تطالعي فيا كده 🤨

ميمونه / مافي شي ايشبي 🫣

باسم / ايشبك انتي تطلي كده ، فيك شي ، انطقي ، ايشبو وجهك اصفر وعيونك كده دبلانه ، اقتلك لو قلتي حبله اقسم بالله اشرح وجهك دا 😡، الاتفاق اتفاق مافينا من اللعبطه والبهلله الزايده ، وقولي والله مانتبهت والله مادري ايشكلو ، ادعس وجهك دا فاهمه 🤬

ميمونه / صلي على النبي ياهو ايشبك بسم الله احد جاب سيره الحمل ايشبك انت هجت كده عليا حرام عليك ، وتبغا تدعسني وانا ماسويت شي ولا فتحت فمي بكلمه (( تبكي )) 😭

باسم / ( عليه الصلاة والسلام)) لا تبكي فجعتيني انتي كمان تطلي فيها كانك حتموتي لايكون بس في شي تاني ولا تكوني ماطبختي 😤 اعترفي وبطلي بكا ومرقعه زايده حقت كهن الحريم

ميمونه / ممكن تهدا انت وترحمني شويه ، ماطبخت ايوه 😥

(( يقوم باسم من الكنبه ويوقف ويصرخ )) 🤬

باسم / ايش ، ليش ايشبك مو عارفه اني جي على الغدى ياحرمه ، اكون مفرفر جوع وطلعتلي الصفرا انتي ماتخافي ربك

ميمونه تطالع في الارض 😞/ انا تعبانه وحزينه ماقدرت اطلبخ تعبت مره من صباح امس ومن داك الوقت انا في المستشفى قبل شويه وصلت البيت (( يجلس ويهدأ ))

باسم / وي لا ياشيخه 😳، سلامتك والله ، ليش ما كلمتيني ، ايش صارلك اذا مو حمل ومصيبه ايش الي يوجعك طيب

ميمونه / انت منعتني اتصلبك حتى في الطوارئ طيب ايش اسوي انا ، المهم من يوم مامشيت قبل امس في الليل تعبت مره واتصلت على اخويا يوديني المستشفى وتحاليل واشعه (( وبدات تبكي )) وقبل مارجع دوبي استلمت النتيجه 😭

باسم / ايش اشبك سيبتي ركبي اهرجي

ميمونه / انا طلع عندي ضعف وفشل في عضلة القلب ، ومح اقدر اكمل معاك انتبهلك للاسف ولا اطبخ لك فمرضي دا يخليني اتعب مره وممنوع اعمل مجهود 😭، فلازم تسيبني وترجع لبيتك ومرتك واولادك انا ماعاد في فايده مني خلاص سامحيني 😭

باسم 😰/ لاحول ولاقوه الابالله ياربي ايش اسوي سلامتك والله صدقيني حنلاقي حل حتفرج وتتعافي ياشيخه ، لا تقولي كده

اسمعي حنكلم أحد من اهلك ينتبهلك وانا مافي ، اترنك مطرمخه

وحالتك حاله وعيشتك نخاله 🥵

ميمونه / الله يعطيك العافيه شكرا على وقوفك جنبي مايحرمني منك ، خلاص لاتقعد مبوز كده

باسم / الله يسلمك ، طيب ماتقدري تسويلي اندومي على الماشي 🤤كده مع شويتين خضار مقلقله كده مع شويه صوص من دا الطعم حقك

ميمونه / حاضر أمرك ياسيدي (( وتقوم تروح المطبخ وهيه تجر رجولها جر )) وتتكلم مع نفسها : اما راجل قليل الحيه صحيح 🤬أنا منكوبه وهو همو على كرشو مادري مرتو دي كيف صابره عليه احس اتزوج مطعم عليها مو حرمه ربي يفترك 😤

بعد ما حطتلو الاكل على الصفره قعد ياكل زي المفاجيع ولا فكر حتى يطالع فيها قامت دخلت غرفتها ورقعت الباب وحطت راسها على المخده ونامت زي القتيله ، وقام بعد ماخلص دخل الغرفه عليها لقاها نايمه 😴

باسم / ميمونه أنتي نمتي ياروحي ، شكلك خلاص رحتي في سابع نومه ، أقلك مافي باقي من صينيه الكنافه حقتك ديك الرهيبه ولا خلصت 🤤

ميمونه / أطلع بره وصك الباب 😵

باسم / ههه طيب طيب بما انك تعبانه خلاص انا برجع البيت التاني امري لله مابغا ازعجك تصبحي على خير مع السلامه (( يخرج ويصك الباب )) 😵‍💫

ميمونه / بلا في شكلك قلعه تقلعك 😷

طبعاً هنا باسم لقى نفسو ورطان وقدو كدب على ساره وقلها انو طالع الهدى مع أصحابو قام راح بيت أبوه يبات عندو لين بكره ويرجع لبيتو ودق سلف لعندو ودق الباب

باسم / أبويا حبيبي كيفك ياهو تعال الحق ولدك الي غرق في شبر مويه 🫨

عبد اللطيف / ايشبك أيش في ساره عرفت شي ياواد انطق سيبت ركبي 😲

باسم / لا ياشيخ فال الله ولا فالك الحرمه ماتدري ، بس في مصيبه تانيه ماكانت في الحسبان

عبد اللطيف / والله لو ماتنطق ياباسم الزفت اهفك بكف يطيحلك صف سنونك 🤜 دي اهرج خلاص دغري 😑

باسم / طيب طيب ميمونه مرتي التانيه مرضت مره ولاعاد تقدر تطبخ شفت المصيبه الي انا فيها

عبد اللطيف / ايشبها الغلبانه ، تعبتها شكلك من كتر الطبيخ 😵والنفيخ ادميه كانت مشممه مبخره في بيت أهلها وانت نكبتها حسبي الله عليك ولا كمان بكل عين بجحه تقول ماتقدر تطبخلك

باسم 🥴/ يابويا ارحمني لجل الله اقلك الادميه مريضه مره وانا ما سويت شي وربي ايش اسوي دحين تقول قلبها تعبان ومادري ايش نسيت

عبد اللطيف / حتى مو فاكر ايش علتها روح ياشيخ منك لله ، خلاص بكره تتعافى وترجع تسممك 😤

باسم / تقول ماتقدر مره قلبها وجعان والدكتور حذرها من الاجهاد وبالعربي قالت ماتقدر تطبخ خلاص وتقلي روح بيتك التاني وانا عشاني شهم قلتلها ابداً انا اوقف معاك وانتبهلك ، دحين هيا خدلك أشتريلها اكل من برا ولا ايش مو عارف كيف اتصرف 🫣

عبد اللطيف / ياخي مادري ايش اقلك ، احس نفسي احشرك في قدر ضغط وارتاح منك انا مو داري على ايش اتوحمت امك الله يرحمها ، روح سوي الي تبغا وريح دماغي من زنك 🤬لا عاد اشوف طختك .



باسم / الا بالمناسبه انا ميت جوع وهادي ماسوتلي غير اندومي ملطوش الاقي عندك عشى من حق اختي بدريه 😍اي شي على الماشي ، اقلك انا اروح ادعبس في المطبخ

عبد اللطيف / تعال اقلك لقيتلك عشوه تجننك في كانون بره في فحم بس رش عليه شويه جاز وروح اشوي نفسك بره في الحوش عشان تجي البساس تعرمش عضامك ، انقلع يلا بلا في طختك

، اختك على اخت اختك 🧐

باسم / طيب يابويا طيب مح اعديلك هي ، كنت ابغا اونسك وابات عندك واتعشى وبطلت حاروح بيتي اكرملي وعلى قولت المثل بيتي يابيتاتي ياساتر عيباتي . 😫

يرجع باسم بيتو بعد مامر على مطعم رز بخاري وعبا كرشتو ورجع البيت انخمد بعد ماحصل البيت كلو نايم وتاني يوم .

ساره / باسم ، باسم ليش نايم على الكنبه كده قوم فجعتني انت مو المفروض تكون في الهدا مع اصحابك ايش رجعك 🧐

باسم / يوووه اصبري اصبري افتح عيوني بلا صربعه ، ايوه ، استني ممم اسكتي مو اتضاربت مع الشباب وكل واحد رجع بيتو يلا سيبيني انخمد 😴

ساره / قوم قوم يلا عاد ايش تخرف وتألف ، انا اتصلت بصاحبك في الشاليه ابغا اتطمن عليك قالي الحارس انو مافي احد جا دا الاسبوع ولا الي قبلو ولا الي قبلو فين كنت بتتصرمح وتقلي بتطلع الهدا 🤬

(( قام فز على حيلو مفجوع )) 😰

باسم / ايش !! هادا الحيوان كداب انا اوريه ، فين يعني باتصرمح قال يعني مادري ايش اسالي ابويا حتى هو يعرف اني باطلع الهدا كل اسبوع 😥

ساره / لاتتكذب على عمي اقلك اهجد انا سالت كمان ساميه مرت صاحبك تقول انكم مابتتطلعو من زمان هيا ايش رايك هي كمان بكاشه ؟؟ انطق فين بتروح 😵‍💫

باسم يبلع ريقو / هيا ياستي انا سايبلك البيت وهاجج مو انا كداب هيا انا كداب عيشه تزهق وتطهق وتقصر العمر مايكفي طبيخك زي الزفت وصابر عليك كمان تتهميني بالكدب هيا لاعاد تهرجيني ولا لسانك يخاطب لساني سامعه الكلام ولا لا 😡

ساره / لا 😡

باسم / ايش !! ايش يعني 🥵

ساره / اسمع ياباسم انا ساكتتلك من اول ومابفتح فمي تخرج وتدخل وتغيب بالايام وتسافر بالاسابيع ودحين أتاكدت انو في شي 😤لايكون لاففلك على وحده خواجيه من الشيك وبتدشر معاها ها

باسم / ايشكلو ؟؟ خواجيه وشيك 🥹، لا اتجننتي شكلك رسمي

ساره / الا انت من رجعت من الشيك مزأطط ومفرفش وتخنت وصارت كرشك شبرين وحوايجك كلها ضاقت من الزواج التاني شكلو من الخواجيه الي من الشيك 😡

باسم / اولاً اسمها دولة التشيك مو شيك زي الجهله 😂

ساره / مو مهم شيك ولا زفت المهم دحين اخلص هات الهرجه قبل مااا … 😑

باسم / ايش ياسبع البرمبه هيا قولي ايش 🧐، ايشبك انخرستي ولا صرتي بكمه …. لا لا لا دخيلك ماتسوي 😳كده لا لا تبكي اهجدي

ماقدر على زعلك ياسكرة قلبي لا الا الدموع ماتحمل 😞

ساره / قول قول كيف شكلها شقره وعيونها زرقه 😆

باسم / لو مابطلتي دا الهرج البايخ ترى الطشك سامعه 🤜 ، تعالي يلا بلا في شكلك قال شقره وعيون زرقه هههههههه والله انك بايخه انتي حبيبتي 💖 ولا يمكن ابدا اشوف وحده تانيه بجمالك ودلعك

ساره / طيب هيا لا عاد تسيبنا وتسافر وتروح هنا وهنا الله يخليك انا احبك مره وماقدر على بعدك عني 😊

باسم / حاضر وانا كمان احبك واموت في دباديبك ودباديب اهلك

ساره / مالك باأهلي خليك في دباديبي انا ههه 😚

طبعاً قرطس باسم ساره وتنفس ام الصعداء 😮‍💨 على خروجو من دي الورطه بشق الانفس ، تاني يوم راح الدوام واستاذن عشان يتطمن على ميمونه برضو الرجال مو هاين عليه الحرمه الطيبه الي كانت شايفه طلباتو واكلو فقرر ياخدلها معاه باقه 🌹 ورد و كيكه 🎂من الي يحبها هو الي بالفراوله 🍓

باسم / ميمونتي كيفك اليوم ياحلوه يارب تكوني بخير ، هيا قومي شوفي جبتلك رز مضغوط يحبو قلبك وورد وكيكه فراوله يحبها قلبك 👩‍❤️‍👨

ميمونه / الدكتور قالي اكل أكل خفيف عشان الأكل الدسم يتعب القلب وانا عندي حساسيه من الورد ، وماحب الفراوله 😳

باسم / افاااا مايقومك بالسلامه الا دا الاكل هيا قومي وفي ستين داهيه على الورد اما الكيكه انا اعرف انك ماتحبي الفراوله انا جبتها ليا انا اكلها 😏

ميمونه / لا مابغا بالعافيه ، اصلان او انت ماتفكر فيا ما تجيبلي الأكل الي انت تحبو يالطيف ياكافي البلا 🤕

باسم / طيب الله يسامحك مقبوله منك قومي جيبي الصفره والصحون 🍽️ ودقي شويه سلطه مطحونه وراسين بصل

ميمونه / ماقدر جيب انت ، انا مريضه ماتفهم على يدك نقش الحنه .🥴

باسم / الا ايوه افهم يلا مو مشكله

يقوم باسم المطبخ يدور على البصل والسكاكين والخلاط يبغا يسوي سلطه مدقوقه بس يتفاجأ انو المطبخ مو مجهز بالادوات الازمه

باسم / ياميمونه فين المكينه الي تطحن الطماطم 🤨

ميمونه / ها سلفتها اختي تعال باستلف من الجيران 🤓

باسم / لا خلاص اكل بدون دقس مافي مشكله

ميمونه / اسمع ياباسم انا اليوم في الليل بروح بيت اخويا ماقدر اجلس لوحدي كده طيب انا بعطيك خبر لاعاد تجيني الين ربي يحلها 🥺

باسم وهو بياكل / طيب طيب الله يسهلك يا أمي معذوره(( خلص أكله وراح على بيتو التاني مستصيب في عمرو )) 🙁

طبعا هنا باسم رجع لطبيخ مرتو ساره الي ماينبلع وبدأ شويه شويه يخس وينحف ويرجع لطبيعتو بس كان لازم يفلسع منها كل يومين والتاني ياكل ياعند اخواتو او بيت ابوه او بكل وقاحه في بيت اهل ميمونه 🤓 الي بعدها بكم يوم جاه اتصال من اخوها انها اتنومت في المستشفى ودخلت العنايه المركزه

باسم في المستشفى / ايشبها كانت قبل كم يوم طيبه افكرها خلاص بتتحسن ، ايشبها دي الحرمه ايش علتها 🥺

الدكتور / لا طبعاً الفشل في عضلة القلب مرض مره خطير وقاتل ادعيلها بالشفاء 🙏لانو حالتها جدا خطره وحتمر عليها أيام جدا حرجه

باسم / ايش دي المصايب ياربي ، انا ناقص غلب ، حظي طلع زي الزفت وحده نشيطه وطبيخها نكبه والتانيه معلعلة وطبيخها صاروخي ، استغفر الله بس 😤

الدكتور 😡/ ايش بتخرف انت اقلك زوجتك حالتها حرجه تقلي طبيخ وما طبيخ انت مختل يا أبني ولا عقلك ترللي

باسم / انا داري ياخويا بالله سيبني في حالي 😭

الدكتور / طيب انقلع من هنا وروح اتحلطم بعيد ، اما واحد قليل الاصل صحيح يالطيف 🤬.

(( راح من الهم جلس في كراسي الانتظار يندب ويولول زي الحريم وبعد خمسة دقايق قام شاف مكينه الشكلاتات وطلبلو كده ٦ شكلاتات وبسكوتات وعصير وجلس ينقنق بتعاسه 🥲، وهو جالس ينتظر ويراقب السقف فجأة جالو الدكتور وهو متوتر مره ومتضايق 😓

الدكتور / استاذ باسم ماعرف ايش اقلك شد حيلك وعظم الله اجرك اتوفت مدام ميمونه الله يرحمها 😞، حاولنا قدر المستطاع بس الله اخد وداعته

باسم ينهار على الارض وينفرط بكى زي البزوره الصغار 😭😭🤯

عبد اللطيف / عظم الله اجرك ياولدي الله يرحمها ويغفر لها كانت ست طيبه واميره ، سبحان الله ايش حكمتو رب العالمين تتزوجها انت وتمرض الحرمه وتموت بسرعه سبحان الله 😔

باسم/ الله يرحمها ، من جد كانت مره طيبه وهي عارفه اني اتجوزتها عشان الاكل وكانت مبسوطه وماخلت اكله ماسوتلي هيه عشان انبسط وانا كنت اناني معاها ومعفن دحين عرفت قيمتها غلبانه ☹️

عبد اللطيف / الحمد لله ربي ستر بس وماعرفت ساره بالموضوع 😬 ولا كانت طربقت الدنيا على دماغك الادميه مولعه اصابيعها العشره شمع تقوم انت تغدر بيها وبأصابيعها 👏🏻، هيا انتبه خلاص لبيتك ودبر امورك في سكات اطلب مطاعم ولا شفلك اسر منتجه ولا اي داهيه المهم لا يتكرر الموضوع ويتخرب بيتك فاهم ياواد 🫵🏻

باسم / طيب يابويا والله سامع ومح اكرر 🙏 الموضوع دا خلاص توبه

يمر اسبوع على الوفاه وكان باسم 😪 ممشي حياتو بالطول وبالعرض وكان يتسلتح على اي بيت عشان يستمتع بالاكل الي محروم منه 😪 وبدأ يضارب مع دبان وجههو وكان يقضي اغلب الوقت برا عند اصحابو وبيت ابو وفي يوم من الايام وهو راجع من الدوام دخل البيت وتصقع في خشمو ريحت اكل خرافيه مألوفه.🤔

باسم / ايش الحكايه ياهو ايش الريحه الي تخبل دي

ساره / أهلاً وسهلاً هادي ريحة أكل جاوي يحبو قلبك تعال تعال بسرعه شوف الصفره بلا لكاعه 😠

باسم / واااااال ايش الغدوه دي الي تفتح النفس ماشاء الله من اين لك هاذا انطقي 😍

ساره / ولا شي حبيبي هاذا من فضل ربي عليا 😇 وحده اتعرفت عليها هادي الحرمه تقول اكلها ونفسها في الاكل خرافي اكل بيت كلو تطبخ للعوائل والموظفات وتعمل بوفيهات👍 شي فاخر من الاخر وابشرك اتفقت معاها خلاص تسويلنا الغدى كل يوم 😍وندفعلها بالشهر ، كده انا ارتاح وانت تنبسط ها ، قلي ايش رأيك فيا ياعيوني 😇

باسم / ينصر دينك ياشيخه كده😍 الكلام كنتي من اول معترضه ودايما تبربري ماتبغي اكل من السوق ولا من احد جننتيني خلاص دحين انحلت العقده يارب لك الحمد والشكر ، بس قوليلي ايش الهرجه وليش غيرتي رأيك 🧐

ساره / أبداً والله سمعت حكايه كده خلتني افكر وبطل عناد🥰 ومكابره

باسم / ايش سمعتي هاتي الهرجه بس وانا أكل وانتي اتكلمي 🤤

ساره 😇/ طيب ياسيدي ، هادي مدرسه جديده جات عندنا في المدرسه معلمه تدبير منزلي وحده زي العسل 🍯وجايبه معها كده تقديمات ومعجنات وحلويات زي الضيافه للمعلمات واتجننو الحريم على اكلها يجنن🏆 ياباسم مو معقوله اكلها طعم تقول شيف دارسه في ايطاليا ولا فرنسا ، المهم تقول انها هوايه عندها بعدين فتحت بزنس خاص تبيع الاكل

باسم / ممتاز برافو عليها 👏🏻، كملي ايشبك سكتي فين الحكايه

ساره / ولا شي قعدت تحكي عن قد ايش كسبت ناس وزباين بالهبل

وانو اول زباينها كانت اختها الله يرحمها😉 والغريب انو اختها مره فاشله ولاكانت تعرف تسلق بيضه المهم لا أطول عليك

باسم / عادي طولي واتكلمي للصبح انا مبسوط بحكايه الطباخه وبعدين 😄

ساره 😈/ اختها (( الله يرحمها )) لها حكايه تصوب 🤨 في يوم سمعت من ولد عمها العمل انو عندو صاحب مره منكوب من مرتو اكلها مو قد كده🤨 وهو كان بيدور على زوجه ثانيه تطبخ له وتكون طبيخه ففكرت انها تقلو يبلغ صاحبو انها تعرف تطبخ واتفقت معاه ووافق وفعلاً اتزوجها هادا الرجال الخسيس 😒عشان طبخها وهي ايش عملت حزر (( اتفقت مع اختها تطبخلها لمن زوجها يكون عندها )) 😇

باسم وقفت اللقمه في زورو وتنح 😅/ وبعدين ايش صار ، يعني هيه كانت ماتعرف تطبخ وضحكت عليه وقرطستو ؟؟

ساره 😈 / ولا شي كان مهبول على طبخها مره 🧐، ايوه طبعاً قرطستو وكانت تجيب اكل من عند اختها ، بس وقع في شر اعماله وماتت 🤕 الادميه تخيل ورجع زي البسه عند بيته الاولاني عند مرتو الي طبخا خايس !! 🤧

ساره 😈/ طبعاً هو يفكر انو الهرجه اتقفلت 😑 بالضبه والمفتاح وراح السر حقو مع ميمونه القبر ، ميمونه طلحه دمنهوري ، اخت بدريه دمنهوري المدرسه الجديده صاحبت ساره مرت باسم عبد اللطيف

حكايه عجيبه صح 🧐

باسم / أ أ الموضوع في لبس وتشابه في الاسماء لا اكثر ولا اقل يابنت الحلال ايش التخاريف دي هيا اصبري 😰

ساره 😈/ طيب طيب مافي مشكله اشرح دا الكلام لابويا ياباسم 😡

يمكن تعرف تقرطسو زي ماسويت معايا ياخسيس 🤬

(( تقوم ساره تلبس عبايتها وتخرج من البيت بعد ماطبعاً كانت معبيه نفسها من اول وقدها نقلت كل عفشها بيت ابوها 😎))

عبد اللطيف / قلتلك ياواد الكدب حبلو قصير جنت على نفسها براقش 😎

باسم / ايش اسوي بس (( كان طبخها نكبه يابويا )) 😩

_ خلود عبد الجبار